Aİ Ukraynalı hərbçilərin təlim missiyasını iki il uzatdı

Ukrainskaya Pravda yazır ki, Avropa İttifaqı Ukraynalı hərbçilərə təlim verən EUMAM (Avropa İttifaqının Ukraynanın müdafiəsinə yardım missiyası) fəaliyyət müddətini iki il daha uzadıb.

Aİ-nin xarici işlər və təhlükəsizlik siyasəti üzrə nümayəndəsi Kaya Kallas bildirib ki, müdafiə nazirlərindən ibarət Şura bu qərarı qəbul edib və missiyanın strateji baxışını yeniləyib.

Missiyanın əsas məqsədi Ukraynalı hərbçilərin fərdi hazırlığını artırmaq, bölmələrin qarşılıqlı fəaliyyətini təkmilləşdirmək və ixtisaslaşdırılmış təlimlər keçirməkdir. EUMAM həmçinin üzv dövlətlərin təlim səylərini koordinasiya edir və Avropa Sülh Fondundan maliyyələşir.

Kaya Kallas əlavə edib ki, Aİ Kiyevdə koordinasiya qurmaqda davam edəcək, döyüş təcrübələrini öyrənmək və hərbi təhsili gücləndirmək üzərində işləyəcək.

Eyni zamanda, Niderlandlar Ukraynada hərbçilərin hazırlanması üçün 10 milyon avro ayıracaq. Almaniya isə bildirib ki, Vengriya tərəfindən dondurulmuş 6,6 milyard avroluq Sülh Fondu vəsaitlərinin hamısı Ukraynaya verilməlidir, amma bütün Aİ ölkələri bu mövqeyi dəstəkləmir.