Aİ Ukrayna uşaqlarının qanunsuz çıxarılmasına qarşı sanksiyaları genişləndirib

Ukrainskaya Pravda yazır ki, Avropa İttifaqı Şurası Ukrayna uşaqlarının qanunsuz yolla Rusiyaya və işğal altında olan ərazilərə çıxarılması, həmçinin onların ruslaşdırılması və hərbi tərbiyə verilməsi ilə bağlı şəxslər və təşkilatları sanksiyalar siyahısına daxil edib.

Sanksiyalar qanunsuz deportasiya, uşaqların zorla yerləşdirilməsi, ideoloji təsir və hərbi-patriotik təlimlər həyata keçirənlərə qarşı yönəlib. Siyahıya Moskva şəhər turizm komitəsi, uşaqlar üçün istirahət, turizm və əyləncə təşkil edən iki Rusiya şirkəti daxil edilib.

Bundan əlavə, Rusiya və müvəqqəti işğal olunmuş Ukrayna ərazilərində fəaliyyət göstərən uşaq düşərgələri və idman mərkəzləri hərbi-patriotik və mədəni tədbirlərin təşkilində, onların rus kimliyinə inteqrasiyasında rol oynadıqları üçün siyahıya əlavə olunub.

Sanksiya paketinə Şimali Koreya Dövlətinin Songdowon Uşaq Düşərgəsi də daxildir. Bu düşərgə Ukrayna uşaqlarının Rusiya koordinasiyası ilə müvəqqəti işğal olunmuş ərazilərdən daşınması və prokremlin təbliğat proqramlarında iştirakı səbəbindən sanksiyalara məruz qalır.

Siyahıya Tatarıstan Respublikasının prezidenti Rüstəm Minnihanov, işğal olunmuş ərazilərin təhsil, elm, idman və turizm nazirliklərinin rəhbərləri, eləcə də yerli uşaq düşərgələri və məktəblərin rəhbərləri daxil edilib.

Sanksiyalar çərçivəsində qeyd olunan şəxslərin aktivləri dondurulur, Aİ-nin vətəndaşları və şirkətləri onlara maliyyə və iqtisadi resurslar verməkdən qadağan olunur. Habelə fiziki şəxslərin Aİ ərazisinə giriş və tranzit keçidi qadağan edilir.