ABŞ-a məxsus vertolyot Səudiyyə Ərəbistanı sahilində yoxa çıxdı

News.ru xəbər verir ki, Sikorsky MH-60R Seahawk tipli ABŞ hərbi vertolyotu Qırmızı dəniz üzərində əlaqəni itirib. Vertolyot birdən-birə hündürlüyünü itirərək radar ekranlarından yoxa çıxıb.

Məlumata görə, təxminən saat 00:24-də vertolyot 91 metr hündürlükdə və saatda 220 kilometr sürətlə hərəkət edirdi. 11 dəqiqə sonra bu göstəricilər saatda 17 kilometrə və sıfır metrə düşüb.

Daha iki dəqiqədən sonra sürət tamamilə sıfırlanıb və vertolyotdan transponder siqnalı gəlməyib.

Hadisəyə rəsmi münasibət bildirilməyib. ABŞ Mərkəzi Komandanlığı və Pentaqon bu barədə açıqlama verməyib. Vertolyotun ekipajının taleyi və hadisənin təfərrüatları hələ məlum deyil.

Bundan əvvəl, 2 oktyabrda, ABŞ-ın Boeing P-8A Poseidon kəşfiyyat təyyarəsi Bəhreynin Səhir aviabazasından havaya qalxaraq Yaxın Şərqdə doqquz saatlıq patrul keçirib. Təyyarə Qətəri dövrədən sonra Cənub istiqamətində BƏƏ, Səudiyyə Ərəbistanı və Oman üzərindən uçuşunu davam etdirib və müxtəlif dövrəvi manevrlər icra edib.