Avtomobil İstehsalçıları Assosiasiyasının (OSD) məlumatına görə, 2026-cı ilin ilk beş ayında avtomobil istehsalı illik müqayisədə 10 faiz azalaraq 538 min 718 vahid olub.

Minik avtomobillərinin istehsalı ötən ilin eyni dövrü ilə müqayisədə 20 faiz azalarq 301 min 367 ədədə düşüb. Eyni zamanda, yük avtomobillərinin istehsalı 6 faiz artıb. Ağır yük avtomobillərinin istehsalı isə 8 faiz yüksəlib.

Bu dövrdə avtomobil sənayesinin ümumi istehsal gücünün istifadəsi 61 faiz təşkil edib. Nəqliyyat vasitələrinin növləri üzrə bu göstərici yüngül nəqliyyat vasitələrində (minik avtomobilləri və yüngül yük avtomobilləri) 62 faiz, yük avtomobillərində 57 faiz, avtobus və midibuslarda 67 faiz, traktorlar üzrə isə 27 faiz olub.

OSD may ayında iş günlərinin az olmasının həm istehsal, həm də ixrac göstəricilərinə mənfi təsir etdiyini bildirib.

2026-cı ilin yanvar-may aylarında sənayenin ixracı ədəd baxımından illik müqayisədə 15 faiz azalaraq 373 min 825 vahid olub. Minik avtomobili ixracı 29 faiz azalsa da, kommersiya avtomobili ixracı 5 faiz artıb.

İlkin dəyər baxımından avtomobil ixracatı isə 2 faiz artaraq 16,6 milyard dollar səviyyəsində olub.

Eyni dövrdə avtomobil bazarı illik müqayisədə 8 faiz azalarq 468 min 507 vahid səviyyəsində ölçülüb. Minik avtomobili bazarı 10 faiz azalaraq 356 min 256 ədədə düşüb, yüngül kommersiya avtomobili satışları isə 2 faiz artıb.

Yanvar-may dövründə satılan avtomobillərin arasında yerli istehsalın payı artıb. Ümumilikdə, avtomobillərin yerli payı 30 faizdən 34 faizə yüksəlib. Minik avtomobillərində bu göstərici 31 faizdən 35 faizə, yüngül kommersiya avtomobillərində isə 20 faizdən 23 faizə qalxıb.