Valve nəhayət "Steam Machine"in qiymətini açıqlayıb. 512GB model 1.049 dollar, 2TB modeli isə 300 dollar əlavə qiymətə satılır. Steam Controller ilə birlikdə olan konfiqurasiyalar isə 79 dollar əlavə xərc tələb edir.

Valve "Steam Machine" ilə kompakt konsol alternativi təklif etsə də, məhsulun qiyməti PS5 (599,99 dollar), Xbox Series X (649,99 dollar) və PS5 Pro (899,99 dollar) kimi konsollardan xeyli baha olub. "Steam Machine" PS5 səviyyəsində performans göstərir. Konsol qiymətlərinin artımı isə əsasən komponent çatışmazlığı ilə əlaqəlidir.

Adətən konsol istehsalçıları aparatlarını subsidiyalaşdıraraq qiymətləri aşağı salırlar, lakin Valve "Steam Machine"də belə addımlar atmayacaq. Şirkət belə açıqlama verib:

"Bu üsul sadə görünsə də, sağlam ekosistemlərin necə yaradıldığına dair inancımıza uyğun deyil. Valve-da biz açıq sistemlərin uzunmüddətli perspektivdə həm özümüz, həm də müştərilər üçün daha faydalı olduğuna inanırıq. PC ekosisteminin açıqlığı hardware və proqram təminatı sahəsində əsas yeniliklərin sürətlə yaranmasına səbəb olub, çünki hər kəs öz ideyasını həyata keçirmək imkanı qazanıb. Şirkətlər aparatlarını zərər ilə satışa çıxarıb ya da eksklüziv kontent alaraq daha bağlı sistem qurmağa çalışırlar, burada istifadəçi istədiyi proqramı seçə bilmir."

"Biz PC aparatlarında belə bağlı sistem istəmirik və hesab edirik ki, istifadəçilər də istəməməlidir. Valve aparatını almaq məcburiyyəti olmamalıdır, bu, oyun oynamaq üçün mövcud olan seçimlərdən biri kimi qalmalıdır. Beləliklə, istifadəçi qiymət, performans, forma, periferiya dəstəyi kimi öz prioritetlərinə uyğun cihazı seçə bilər. Bu, açıq PC platformasının gücüdür; aparat subsidiyalaşdırılması isə bunun əksinədir."

Valve "Steam Machine"i əsasən komponent və istehsal xərcləri ilə satır. "Steam Deck" ilə müqayisədə bu dəfə daha az marja ilə daha sərt qiymət siyasəti izlənilir. Komponent böhranı səbəbindən "Steam Machine"in planlaşdırılan istehsal miqdarı təxminən iki dəfə azaldılıb. Bu cihazın bazara çıxması isə şirkət üçün özü kiçik bir uğurdur.

Yeniləmə, 22 iyun: Valve-un blogunda əlavə məlumatlar dərc olunub, açıqlamaların əvvəlcə "The Verge" üçün təqdim edilən versiyasından fərqli olduğu bildirilib.