İqlim dəyişikliklərinə bağlı olaraq artan yağışlar Türkiyənin kənd təsərrüfatında fərqli təsirlərə səbəb olub. Meyvə və tərəvəz məhsullarının keyfiyyəti düşüb, illərlə davam edən quraqlıqdan sonra isə taxıl məhsullarının artmasına şərait yaranıb.

Güclü yağışlar meyvə və tərəvəz məhsullarında keyfiyyət itkisinə və bəzi taxıl sahələrində pas xəstəliyinə səbəb olub. Eyni zamanda, yağışlar uzun müddət davam edən quraqlıqlardan zərər görmüş çoxlu taxıl məhsulunun yenidən canlanmasına kömək edib. Bəzi bölgələrdə buğda və arpa istehsalının ötən illə müqayisədə 100 faizdən çox artacağı gözlənilir.

Ümumiyyətlə, kənd təsərrüfatı məhsuldarlığını aşağı salan və ərzaq qiymətlərinin artmasına səbəb olan iqlim dəyişiklikləri bu dəfə bəzi məhsullarda məhsulun artmasına ümidsizlikdən çox ümid yaradır. İki ildi davam edən sərt quraqlıqlardan sonra bu mövsüm yağan yağışlar taxıl məhsullarının bol olacağına ümidləri artırıb.

Müxtəlif əyalətlərin kənd təsərrüfatı palatalarının nümayəndələri bildiriblər ki, bəzi ərazilərdə fazla yağışın səbəb olduğu pas xəstəliklərinə baxmayaraq, digər bölgələrdə istehsal iki dəfədən çox artacaq. Sektor nümayəndələri qeyd ediblər ki, yağışlar meyvə və tərəvəz becərənlər üçün itkilərə səbəb olsa da, taxıl istehsalçıları üçün xilas yolu olub. Fermerlərin bundan nə qədər faydalanacağı məhsul yığım dövründə elan olunacaq satınalma qiymətlərindən asılıdır.

Türkiyə Kənd Təsərrüfatı Palataları İttifaqının (TZOB) idarə heyətinin üzvü, Konyanın Meram Kənd Təsərrüfatı Palatasının sədri Mustafa Hepokur bildirib ki, yağış taxıl məhsullarında məhsuldarlığı artıraraq yığımın təxminən 35 faiz yüksələcəyinə ümid verir.

Şanlıurfanın Hilvan Kənd Təsərrüfatı Palatasının sədri Hikmət İpar isə bölgədə son iki ildə sərt quraqlıqlar yaşandığını, ötən il Şanlıurfada 1.6 milyon dekar torpağın quraqlıqdan zərər gördüyünü və itkinin təxminən 70 faiz olduğunu söyləyib. O, son yağışlara görə ötən illə müqayisədə taxıl məhsullarında 100 faizdən çox, orta illərlə müqayisədə isə 30–40 faiz məhsul artımının olduğunu bildirib.

Türkiyə Statistika Institutu (TÜİK) ötən həftə bitki məhsulları üzrə ilkin proqnozları açıqlayıb və bir neçə taxıl və meyvə kateqoriyalarında rekord səviyyələr gözlənildiyini bildirib. 2026-cı ildə ümumi taxıl istehsalının ötən ilə nisbətən 21.7 faiz artaraq təxminən 41.6 milyon tona çatacağı proqnozlaşdırılır.

Buğda istehsalının 26.7 faiz artaraq 22.8 milyon tona, arpada isə istehsalın 50 faiz yüksələrək 9 milyon tona çatacağı gözlənilir. Amma qarğıdalı istehsalının 5.9 faiz azalaraq 8 milyon ton olacağı təxmin edilir.

TÜİK tərəvəz istehsalının ötən illə müqayisədə demək olar ki, sabit qalacağını, amma meyvə, içki və ədviyyat məhsullarının istehsalının 57.8 faiz artaraq təxminən 31 milyon ton olacağını proqnozlaşdırır.