Kolumbiyada gərgin keçən prezident seçkisindən sonra ilkin proqnozlar müstəqil namizəd Abelardo de la Espriellanın solçu rəqibi İvan Çepedadan az fərqlə öndə olduğunu göstərir.

Seçkinin ilk turunda səslərin yarısı sayılıb, ölkənin seçki rəsmiləri məlumat verib ki, de la Espriella 43 faiz, Çepeda isə 42 faiz səs toplayıb.

Hər iki namizəd görünür ki, qalib olmaq üçün tələb olunan 50 faizdən çox səslə irəli çıxmayacaq. Buna görə ikinci turun keçiriləcəyi ehtimalı yüksəlib.

Öndə gedən Abelardo de la Espriella özünü cinayətkarlığa qarşı sərt mübarizə aparan şəxs kimi təqdim edir və ABŞ Prezidenti Donald Trampı dəstəklədiyini bildirib. 47 yaşlı iş adamının kampaniya üslubu Salvadorun sağçı prezidenti Nayib Bukeləyə bənzədilir.

Kolumbiyada səsvermədə “tam sülh” yoxsa sərt tədbirlər üstünlük qazanacaq

63 yaşlı solçu senator İvan Çepeda sosial islahatların genişləndirilməsini vəd edir. Prezident Qustavo Petro əlavə müddətə namizəd ola bilmədiyi üçün Çepedanın yanında yer alıb.

Kolumbiyada namizədlərin mövqeləri

Namizədlər silahlı narkotiklə məşğul olan quldur qruplarla mübarizə aparmaq, bərabərsizliyi və yoxsulluğu azaltmaq, ölkənin səhiyyə sistemini yaxşılaşdırmaq vədilə seçkilərdə iştirak edir. Lakin onların yanaşmaları fərqlidir.

Solçu Çepeda, öldürülmüş kommunist liderin oğlu olaraq, qeyri-qanuni silahlı qruplarla danışıqlar yolu ilə sülh əldə etməyi vəd edir. Bu siyasət Petro hökuməti dövründə az irəliləyişə səbəb olub.

De la Espriella isə qruplara qarşı sərt əməliyyatlar aparmağı, 10 "mega-həbsxana"nın tikintisini təklif edir. O, cinayətkarlığa qarşı sərt tədbirlərlə yanaşı yoxsulluğa qarşı təhsil, səhiyyə və sosial mənzillərlə mübarizə aparacağını bildirib.

Çepeda gəliri yüksək olanlardan vergiləri artıraraq Kolumbiyanın səhiyyəsini genişləndirməyi, həmçinin altmış illik daxili münaqişə qurbanlarına bir milyon hektar torpaq verməyi planlaşdırır.

Seçkiöncəsi sorğular Çepedanın üstünlüyünü göstərib. Eyni zamanda sağçı senator Paloma Valensiyanın da aralarında olduğu sıx üçlü mübarizənin olacağı proqnozlaşdırılıb. Lakin Valensiya səsin 7 faizindən azını əldə edib.

Valensiya şirkətlərə vergi güzəştləri verərək daha çox iş yeri yaradılmasını və yoxsulluğun azalmasını təklif edib. O, sosial proqramlar və səhiyyəyə əlavə maliyyə ayırmağı isə vergidən yox, neft və qaz ehtiyatlarının kəşfi yolu ilə maliyyələşdirməyi təklif edir.