Kamerunda bir həftə ərzində ən azı səkkiz qadının öldürülməsi qəzəb doğurub. Bir çoxları hökumətdən qadınları və qızları qorumaq üçün sərt və effektli addımlar atmağı tələb edir.

Bu mövzu ilə bağlı məşhur futbolçu Nçut Njoya Acara da danışıb. O, qadınlara qarşı törədilən bu trajiq dalğanın dayanmasını istəyir və "səssizlik günahdır" deyib.

Hökumət də qadınlara qarşı hücumların artmasından narahatdır. Rəsmi statistika göstərir ki, bu il yanvar-aprel aylarında ən azı 50 qadın öldürülüb. Ötən il isə bu rəqəm 77 olub.

Son hadisə çərşənbə axşamı baş verib. Paytaxt Yaoundé-də 44 yaşlı qadın otel otağında öldürülüb. O, iddialara görə, 22 yaşlı şəxs tərəfindən bıçaqla qətlə yetirilib və həmin şəxs polis tərəfindən tutulub.

Kamerunun tanınmış futbolçularından olan Acara deyib ki, "Kamerunda qadın olmaq heç vaxt risk olmamalıdır".

33 yaşlı hücumçu Rusiyada, İsveçdə, Norveçdə, İspaniyada, İtaliyada və Səudiyyə Ərəbistanında peşəkar futbol oynayıb. O, həmçinin "Atlético Madrid" və "İnter Milan" klublarında da çıxış edib.

Acara vurğulayıb: "Ölkəmizdə son günlər qadınlara qarşı amansız qətllərin artması qarşısında səssizlik günahdır".

Kamerun Yenidənqurma Hərəkatı (CRM) müxalifət partiyası bəyan edib ki, "evdə qadın qətllərinin fatal təkrarlanması" onları narahat edir və hökuməti bu mövzuda passiv olmaqda ittiham edib.

Qadın qətllərinin çoxu ailədaxili zorakılıqdan qaynaqlanır və ölkənin müxtəlif bölgələrində baş verir.

Dövlət mediasının yaydığı videoda Qadınların Gücləndirilməsi və Ailə Naziri Mari-Terez Abena Ondoa öldürmə hadisələrinin "narahatedici" surətdə artdığını tənqid edib. O, hökumətin bu məsələni həll etmək üçün iş aparığını bildirib.

Nazir qeyd edib ki, qadınların gender əsaslı zorakılıqdan qorunması üçün qanun layihəsi Baş nazir tərəfindən gözdən keçirilir.

Lakin vətəndaş cəmiyyəti və qadın hüquqları qrupları qanun layihəsinin qəbulunda hökumətin gecikmə göstərməsindən narazıdır.

İlin son parlament iclası noyabr ayında keçirilməlidir. Amma qadına qarşı qətlləri sənədləşdirən təşkilatın rəhbəri Vivian Tati BBC-yə deyib ki, qanun layihəsinin iclasda qəbul olunacağına əmin deyil.

Vivian Tati bildirib: "Biz narahatıq, çünki noyabr sessiyası əsasən büdcə müzakirələrinə həsr olunacaq. Ona görə də qanun layihəsinin qəbulunu necə başa çatdıracaqlarını bilmirik".

O, ailədaxili mübahisələri həll etmək və zorakılığın qarşısını almaq üçün xüsusi məhkəmənin yaradılmasını təklif edib.

BMT-nin son məlumatlarına görə, 2024-cü ildə Afrika femisid qurbanlarının sayı və əhalisinə nisbətdə göstəricilər baxımından ən yüksək səviyyədədir. Təxminən 22 min 600 hadisə qeydə alınıb. Bu rəqəmlər bəzi qətllərin hesabatda əks olunmaması və hökumətlərin məlumatları ardıcıl qeyd etməməsi səbəbindən təxmindir.

Əlaqəli mövzular

• Afrika
• Kamerun
• Afrikada qadın hüquqları