Hərbçilər Trampın iqamətgahı üzərində təyyarəni saxlayıb

ABŞ hərbçiləri Floridada, Donald Trampın yerləşdiyi Mar-a-Laqo iqamətgahı üzərində uçuş üçün qoyulmuş müvəqqəti məhdudiyyəti pozan mülki təyyarəni saxladı.

Məlumatı Şimali Amerika Hava-Kosmos Müdafiə Komandanlığı (NORAD) sosial şəbəkə X-də açıqlayıb.

Hadisənin Palm-Biç şəhəri üzərində baş verdiyi bildirilir. Təyyarəni saxlamaq üçün komandanlıq F-16 döyüş təyyarəsini işə salıb.

Hərbi təyyarə pilotun diqqətini çəkmək üçün standart manevr edib. Daha sonra mülki təyyarənin pilotu hərbçilərlə əlaqə quraraq göstərişlərinə əməl edib və uçuş məhdudiyyətlərinin tətbiq olunduğu hava məkanını tərk edib.