Cənubi Afrikada qanunsuz miqrantların ölkədən deportasiyasını tələb edən minlərlə insan etiraz aksiyaları keçirib.

Cənubi Afrika hökuməti bildirib ki, "miqrasiya idarəçiliyi" kampaniyasına başladığı gündən ötən beş həftə ərzində 53 000-dən çox əcnəbi deportasiya və ya vətəninə qaytarılıb.

Rəsmi şəxslər deyir ki, deportasiya edilənlərin əksəriyyəti Malavi, Zimbabve və Mozambikdən olub və proses davam etdikcə sayı artacaq.

Cənubi Afrika son illərin ən böyük qanunsuz miqranta qarşı əməliyyatını keçirir. Bu, ölkədə miqrasiya əleyhinə həftələrlə davam edən etirazların, zorakılıq, hədələmə və talan hallarının ardınca baş verir.

Etirazçılar sərhəd nəzarətinin gücləndirilməsini və kütləvi deportasiyaları tələb edir. Onlar miqrantları yüksələn işsizlik, artan cinayət və ictimai xidmətlərin zəifləməsi ilə əlaqələndirirlər.

BMT Cənubi Afrikada sosial və iqtisadi problemlərin miqrantlara bağlanmasına qarşı xəbərdarlıq edib.

Miqrantlara qarşı fəallar tələbləri yerinə yetirilənə qədər həftəlik etirazlar keçirmək istəyir. Zorakılıq ehtimalları barədə narahatlıqlar var.

Nümayişçilər 30 iyunu qanunsuz miqrantların ölkəni tərk etmək üçün "rəsmi olmayan son tarix" kimi göstəriblər. Bu tarix yaxınlaşdıqca çox sayda əcnəbi zorakılıqdan və hədələmələrdən qaçaraq ölkəni tərk edib.

Qana, Nigeriya, Uqanda və Keniya da daxil olmaqla bir neçə ölkə vətəndaşlarını son həftələrdə geri göndərib.

Ədalət və Konstitusiya İnkişafı naziri Mmamoloko Kubayi bazar günü açıqlayıb ki, 53 499 xarici vətəndaş deportasiya və vətəninə qaytarılmaq üçün prosesdən keçirilib. Bunların çoxu Malavindən, onu Zimbabve və Mozambik izləyir.

Kubayi Pretoriada keçirilən mətbuat konfransında deyib: "Xalqın narahatlıqlarını nəzərə alaraq, vətəndaşlıq statusundan asılı olmayaraq hər kəsin hüquq və ləyaqətini qoruyaraq, nizamlı və qaydalı miqrasiyanın təmin edilməsi üçün çalışırıq".

O əlavə edib ki, deportasiya və vətəninə qaytarma prosesi polisin cinayət məsuliyyətinə cəlb etmək istədiyi şəxsləri də aşkarlamağa kömək edib.

Hakimiyyətlər miqrasiya qanunlarını tətbiq etməyə davam edəcək, lakin etirazçılar qanunsuz miqrantları qoruyan ev və iş yerlərində qeyri-qanuni axtarış aparmamağa çağırılıb.

Cənubi Afrika prezidenti Siril Ramafosa miqrasiya ilə bağlı xalq narahatlıqlarını qəbul etsə də, miqrantlara qarşı hücumları qınayıb və sakinləri qanunu öz əllərilə tətbiq etməməkdə xəbərdar edib.

Cənubi Afrika Afrika qitəsində ən zəngin ölkədir və uzun müddət iqtisadi imkanlar üçün miqrantları cəlb edib. Onlardan bəziləri ölkəyə qanunsuz daxil olurlar.