Banqkokda ictimai avtobusla ölümcül toqquşmaya görə məsul olan yük qatarının sürücüsünün narkotik testinin müsbət çıxdığı və səhlənkar sürücülük ittihamı ilə üzləşdiyi bildirilib.

Hadisə şənbə günü Asoke-Din Daeng dəmiryolu keçidində baş verib. Qatar, dəmiryolunda dayanmış ictimai avtobusa çırpılıb.

Avtobus alovlanaraq 8 nəfərin həlak olmasına və onlarca insanın yaralanmasına səbəb olub. İlkin məlumatlara görə, avtobus ağır tıxac səbəbindən relslərdə qalaraq keçid bariyerlərinin düzgün bağlanmasına mane olub.

Asoke-Din Daeng dəmiryolu keçidi Banqkokun ən çox hərəkətli yerlərindən biridir və çoxlu tıxac ilə seçilir.

Polis həm avtobus sürücüsünün, həm də bariyerin əl ilə endirilməsindən məsul olan mühafizənin də ittiham olunduğunu bildirib.

Taylandın dəmir yolu nəqliyyatı idarəsinin rəhbəri Pichet Kunadhamraks bütün qatar sürücüləri və dəmiryolu işçiləri üçün növbədən əvvəl mütəmadi narkotik və spirt testlərinin məcburi olunmasını əmr edib.

Polis qatar sürücüsünün sidik testində hansı narkotiklərin tapıldığı barədə məlumat verməyib.

Pichetin bildirməsinə görə, qatarın qara qutusundan əldə olunan ilkin məlumatlar onun təcili əyləc sisteminin avtobusa təxminən 100 metr məsafədə işə düşdüyünü göstərir ki, bu da toqquşmanın qarşısını almağa kifayət etməyib.

Taylandın Struktur Mühəndislər Assosiasiyasının prezidenti doktor Amorn Phimarnmas BBC-yə məlumat verib ki, gündə 100 mindən çox yol nəqliyyat vasitəsi Asoke-Din Daeng dəmiryolu keçidindən keçir ki, bu da belə keçidlər üçün təhlükəsizlik həddini aşır.

Keçiddə motosiklet sürücüləri tıxacdan yayınmaq və qatarların keçidini gözləməmək üçün təhlükəsizlik baryerlərini tez-tez keçirlər.

Relslər ətrafındakı yollar salınmazdan əvvəl tikilib və şəhər relslərin ətrafında genişlənərək "riskin adi hal kimi qəbulu"na səbəb olub.

“Risk gündəlik hala çevrilir. İnsanlar 'hər şey qaydasındadır' deyərək davam edir və nəticədə bizi bu cür fəlakətlə üz-üzə qoyur,” – Amorn vurğulayıb.