Bangkokda sellər səbəbindən minlərlə nəfər təxliyə olundu

Anadolu Ajansı yazır ki, güclü yağışlar bir neçə gündür Bangkokun bir çox bölgəsində selə səbəb olub, nəqliyyatda və gündəlik həyatda problemlər yaradıb.

Yağışların təsiri ilə bəzi alçaq ərazilərdəki məhəllələr sular altında qalıb. Bu səbəbdən 50 bölgənin hamısı fəlakət zonası elan edilib.

Tayland rəsmiləri bildirir ki, təxminən 3 min sakin paytaxtın zərərçəkmiş hissələrindən təxliyə edilərək 200-dən çox müvəqqəti sığınacağa yerləşdirilib.

Yağışların miqdarı bəzi yerlərdə 30 santimetrdən çox olub. Hazırda hava şəraiti yaxşılaşır, təmizlik və suyun çəkilməsi işləri davam edir.

Tayland Meteorologiya İdarəsinin məlumatına görə, ölkənin müxtəlif yerlərində orta və güclü yağışlar bu gün də davam edəcək, lakin sabahdan hava şəraitində yaxşılaşma gözlənilir.

Ölkənin digər bölgələrində son 10 gün ərzində baş vermiş seller nəticəsində ən az 8 nəfər həlak olub, 25 bölgədə isə 545 mindən çox insan selin təsiri altındadır.