ABŞ-da birləşmiş əmək təşkilatları və hüquq müdafiə qruplarının koalisiyası federal hökuməti məhkəməyə verib. Onlar xarici tələbələr və jurnalistlərin ölkədə qaldıqları müddətin uzadılmasını məhdudlaşdıran qaydaya son qoymaq istəyir.

Çərşənbə axşamı Massaçusets bölgə məhkəməsində verilən iddianamədə qruplar dəyişikliklərin universitetlər, beynəlxalq tələbələr və alimlər üçün fəlakətli olacağını bildiriblər.

Daxili Təhlükəsizlik Nazirliyinin yeni qaydası beynəlxalq tələbələr üçün F vizalarına, mədəni mübadilə proqramlarında ABŞ-da işləməyə imkan verən J vizalarına və media nümayəndələri üçün I vizalarına müəyyən müddət təyin edir.

Bu vizalar hazırda proqramın və ya iş müddəti boyunca qüvvədədir.

15 sentyabrdan qüvvəyə minəcək qaydalara əsasən tələbə və mübadilə vizalarının müddəti dörd ildən artıq olmayacaq. Jurnalistlərin vizası isə hazırda illərlə davam edə bildiyi halda, 240 gün və ya Çinin vətəndaşları üçün 90 günlə məhdudlaşacaq.

Qruplar iddia ediblər ki, "bu, xarici tələbələri və digər qeyri-immiqrantları ABŞ-a gəlməkdən çəkindirəcək, çünki onlar təhsil müddətində qanuni immiqrasiya statusunu itirmək qorxusu yaşayacaqlar".

"Tələbələr imkanlarını itirəcək, məktəblər istedadlarını itirəcək, ictimaiyyət isə ABŞ-ın ən önəmli ixracat məhsullarından biri olan təhsil vasitəsilə daxil olan milyardlarla dollar iqtisadi gəlirdən məhrum olacaq".

Daxili Təhlükəsizlik Nazirliyinin sözçüsü iddianaməni "hərəkətə keçmək üçün səhnələşdirilmiş" adlandırıb.

O əlavə edib: "Əgər media həqiqətən legitim beynəlxalq tələbələrə dəyər versəydi, Prezident Donald Trampa ABŞ-da təhsil almaq istəyənlərə üstünlük verilməsi üçün fırıldaqlara qarşı sərt tədbirləri üçün təşəkkür edərdilər". Sözçü iddia olunan fırıldaqla bağlı heç bir sübut təqdim etməyib.

US NewsGuild-CWA-nın prezidenti Con Şleuss yeni qaydanı jurnalistlərə qarşı hücum kimi qiymətləndirib.

Amerikanın Milli Müəllimlər Federasiyasının prezidenti Randi Vayngarten ABŞ-ın "öz siyasi məqsədləri üçün qanunu pozduğunu, bununla da amerikalılara və Amerika müəssisələrinə zərər verdiyini" deyib. O, beynəlxalq tələbələrin isə "piyon" kimi istifadə edildiyini vurğulayıb.

Vayngarten bildirib: "Tramp administrasiyasının biliklərə son hücumu beynəlxalq alimlərin təhsilini başa çatdırmaq üçün vaxtını qeyri-sabit şəkildə məhdudlaşdırır və tələbələr üçün dost mühitin düşmən mühitə çevrilməsi riskini yaradır".