Associated Press xəbər agentliyinin məlumatına görə, ABŞ ölkədə sığınacaq almaq üçün müraciət edən və ya belə bir ehtimalı olan 200 minə yaxın xaricinin iş və turizm vizalarını ləğv etməyə hazırlaşır.

Agentlik Dövlət Departamentinin sənədlərinə və iki ABŞ rəsmisi ilə müsahibələrə istinadla bazar ertəsi bildirib ki, plan həyata keçərsə, bu, ölkə tarixində ən böyük kütləvi viza ləğvi olacaq.

Xəbərdə Dövlət Departamentinin bu tədbiri yaxın həftələrdə Daxili Təhlükəsizlik Departamenti ilə birgə elan etməsinin gözləndiyi vurğulanıb.

Hədəf alınacaq vizalar isə 2016-2026-cı illər arasında verilmiş B1 və B2 vizalarıdır. Bu vizanın sahibləri sığınacaq tələb edən və ya indi belə müraciət edən şəxslərdir.

Dövlət Departamentinin sözçüsü Tommi Piqott deyib: “DHS ilə koordinasiyada ABŞ-a qısa müddətli ziyarətçi kimi gələn, lakin sonradan daimi qalmaq üçün sığınacaq tələb edən xaricilərin qeyri-immiqrasiya vizalarını müəyyənləşdirib ləğv edirik.”

AP-yə məlumat verən rəsmlər bildiriblər ki, vizaların ləğvi avtomatik deportasiya prosesini başlatmayacaq.

Əksinə, sığınacaq prosesində olan şəxslərin çoxu fərqli immiqrasiya kateqoriyasına keçəcək. Bu, onların iş və ya turizm vizası statusunu pozacaq, amma işləri davam edəcək.

Bazar ertəsi Dövlət Departamentinin müavini Kristofer Landau sosial mediada ABŞ-a turist və iş vizaları ilə daxil olub sonradan sığınacaq üçün müraciət edənləri tənqid edib.

Landau X platformasında yazıb: “ABŞ-da və bütün dünyada saxta sığınacaq iddialarından yorulublar. Sığınacaq immiqrasiya qanunlarını keçmək üçün boşluq olmamalıdır.”

Prezident Donald Tramp ötən il vəzifəyə ikinci dəfə başlarkən administrasiya vizaya müraciət edənlərə qarşı tələbləri artırıb. Onlardan sosial media tarixçələri barədə daha çox məlumat tələb edir, vizaların işlənməsi üçün yüksək zəmanət vergiləri qoyur və bəzi ölkələrin vətəndaşlarına viza verməyi qadağan edir.

Son 18 ayda isə Dövlət Departamenti sərxoş halda sürücülükdən tutmuş zorakılıq və quldurluğa qədər müxtəlif cinayətlərdə ittiham edilən, yaxud ABŞ siyasətlərinə, xüsusilə Yaxın Şərqdəki fəaliyyətlərinə qarşı çıxan şəxslərin təxminən 175 min vizasını ləğv edib.