Rusiya ərazisində ukraynalı dron hücumları nəticəsində azı üç nəfər həlak olub. Başqa hücum isə Tambov regionunda "Wildberries" şirkətinə məxsus anbarı yandırıb.

Tambov qubernatoru Yevgeni Pervışov çərşənbə günü bildirib ki, logistika mərkəzi tamamilə yanaraq məhv olub. O, əvvəl anbarın təxminən 100 min kvadrat metr, yəni 14 futbol meydançası qədər sahəsinin yanğından zərər gördüyünü demişdi.

O, Telegram vasitəsilə yazıb ki, hücum zamanı bir nəfər yaralanıb. Yanğının söndürülüb-söndürülməməsi barədə məlumat verməyib.

Hücum gecə saatlarında Moskvanın təxminən 500 kilometr cənğu-şərqində, Kotovsk şəhərindəki "Wildberries" logistika mərkəzinə qarşı edilib.

Regional qubernator Nijnı Novqorod regionunda başqa bir sənaye obyektinin də dron hücumunda zərər çəkdiyini bildirib.

"Reuters" agentliyinin Telegram-dakı məlumatına görə, Lipetsk regionunda düşən dronun başlatdığı yanğında bir kişi və 14 yaşlı yeniyetmə həlak olub. Ukrayna ilə sərhəddə yerləşən Belqorod regionunda isə qadın dron hücumu nəticəsində ölüb.

Ukrayna iyulun ortalarından bəri "Wildberries" obyektlərini hədəf götürür. Son günlərdə isə pərakəndə satış şirkətinin əsas rəqibi "Ozon" da zərbələr alıb.

Bu iki şirkət Rusiya iqtisadiyyatının sürətlə inkişaf edən sahələrində üstünlük təşkil edir. Rusiya-Ukrayna müharibəsinin dörd ildən çox davam etməsinə baxmayaraq, ölkə iqtisadiyyatı demək olar ki, durğun vəziyyətdədir.

Ukrayna "Wildberries"in Rusiya hərbi təchizat zəncirində rolu olduğunu iddia edir. Moskva və şirkət isə obyektlərin mülki məqsədlər üçün istifadə olunduğunu bildirir.

Rusiya Müdafiə Nazirliyi gecə ərzində, o cümlədən işğal altındakı Ukrayna ərazilərində, hava müdafiə sistemlərinin 426 ukraynalı dronu vurub məhv etdiyini açıqlayıb.

Moskva və Kiyev 2022-ci ilin fevralında Rusiyanın genişmiqyaslı işğalını başladığı vaxtdan bəri mülki şəxslərin hədəf alınması ittihamlarını dəfələrlə rədd edib. Lakin son aylarda cəbhədə hücumlar artır, mülki itkilər çoxalır.