Uber bütün 30 min işçisini ChatGPT Work-dan istifadəyə başlayır

Uber və OpenAI əməkdaşlıqlarını genişləndirib. Uber TechCrunch-a açıqlayıb ki, bütün qlobal işçi heyəti — təxminən 30 min nəfər — bundan sonra ChatGPT Work-dan istifadə edəcək.

ChatGPT Work iyul ayında müəssisələr üçün nəzərdə tutulmuş süni intellekt agenti kimi təqdim olunub. Korporativ komandalar müxtəlif iş proseslərində bunu istifadə edə bilər.

Uber əvvəlcə bu ilın əvvəlində ChatGPT Work-u 1.000 işçisi ilə sınayıb. İndi isə istifadəsini bütün şirkətə genişləndirib.

İlkin pilot layihə Uber-in maliyyə, əməliyyat və məhsul bölmələrindən işçilərə tətbiq olunub. Əsas istifadəçilərin təxminən 80 faizi mühəndis olmayan işçilər idi, Uber-in texnologiya üzrə vitse-prezidenti Sumanth Sukumar TechCrunch-a deyib.

"Onlar bu alətdən müxtəlif tapşırıqlarda istifadə edib: əməliyyatlarımızın mürəkkəb məlumatlarını təhlil edib trendləri müəyyənləşdirmək və tövsiyələr hazırlamaq; müxtəlif bazarlara və dillərə uyğun təlim materialları hazırlamaq; gündəlik işlərini idarə etmək üçün fərdi interaktiv panelər yaratmaq" — deyə Sukumar bildirib.

Uber indi ChatGPT-yə tam gücü ilə üz tutub, lakin işçilərin onu necə istifadə edəcəyi barədə hələ yekun qərar verməyib. Sukumar qeyd edib: "Biz güclü süni intellekt alətlərini bütün Uber-də əlçatan etməyi və komandaların sınaq aparması üçün şərait yaratmağı düşünürük. Məsələn, bu ilin əvvəlində biz 30 süni intellekt mühəndisini Uber-in müxtəlif komandaları ilə cütləşdirdik və onlara iki həftə ərzində işlərinin əsas hissələrini avtomatlaşdırmaq tapşırığı verdik. Bu ‘süni intellekt qrupları’ bizə texniki bilikləri və konkret iş təcrübəsini birləşdirdikdə imkanların nə qədər geniş olduğunu göstərdi."

Uber chatbotun yeni tətbiqinə nə qədər vəsait sərf etdiyini açıqlamayıb. Sukumar bildirib ki, şirkət işçilərin bu aləti necə istifadə etdiyini izləyəcək: "Biz işçilərin texnologiyadan necə istifadə etdiyini, hansı iş prosesləri yaratdıqlarını və onun işi asanlaşdırmağı necə təmin etdiyini müşahidə edəcəyik. Bu nəticələri qiymətləndirib süni intellekti şirkətin bütün sahələrində necə tətbiq edəcəyimizi müəyyənləşdirəcəyik." Uber bildirir ki, OpenAI chatbotun inteqrasiyasında yaxından əməkdaşlıq edib.

OpenAI öz müəssisə biznesini sürətlə genişləndirir və əsas rəqibi Anthropic ilə rəqabət aparır. Əsasən istehlakçı markası kimi tanınan ChatGPT yaradıcı şirkəti biznes müştərilər arasında sürətlə populyarlıq qazanıb, digər süni intellekt şirkətləri isə bu sürətlə ayaqlaşa bilmir.