Türkiyədə 21 mindən çox otel "Booking.com"un anti-rəqabətçi komissiya haqları səbəbilə Avropada kollektif məhkəmə iddiasına qoşula bilər.

Niderlandda fəaliyyət göstərən Stichting Hotel Claims Alliance təşkilatı bu məhkəmə işini idarə edir. İşə HOTREC və 30-dan çox milli otel assosiasiyası dəstək verir. Bütün hüququ olan Türkiyə otelləri müraciət edərsə, 2004-2025-ci illər üçün ümumi təzminat 3 milyard avroya çata bilər. İştirak səviyyəsi 10 faiz olsa, 450-500 milyon avro arasında təzminat gözlənilir.

Hergüner Bilgen Üçer Hüquq Partnyorluğu prosesi hüquqi baxımdan dəstəkləyir, qonaqpərvərlik sektorunun mütəxəssisi Armin Zerunyan kömək edir. İddia bazar gücünün sui-istifadəsi nəticəsində müstəqil və orta səviyyəli otellərin 25-30 faiz arası yüksək komissiya ödəməyə məcbur edilməsinə qarşıdır.

Zerunyan bildirib ki, məhkəmə prosesi platforma ilə ticarət əlaqələrinin kəsilməsi demək deyil. Komissiyanı azaltmaq yüksək mövsümdə qiymətlərin aşağı düşməsinə şərait yarada bilər.

Hüquqi proses 2027-ci ildə başlayacaq və 2-3 il davam edə bilər, lakin razılaşma yolu ilə daha tez başa çatdırıla bilər. İştirak edən otellərin kimliyi məxfi saxlanılır, təzminatların hesablanması zamanı rəqəmsal komissiya qəbzləri tələb olunur. Avropanın 15 mindən çox oteli iddiaya qoşulub və fəaliyyətini itirmədən, təzyiqə məruz qalmadan davam etdirir.

Türkiyənin Rekabet Kurulu platforma pozuntularını 2017-ci ildə aşkarlayıb. Bu qərar 2024-cü il sentyabrın 19-da verilmiş Avropa Ədliyyə Məhkəməsinin yekun hökmlərindən əvvəl olub. Deputatlar isə ötən həftə parlamentə xarici rezervasiya platformalarının, o cümlədən "Airbnb"nin iki illik lisenziya üçün beş milyon türk lirəsi (104 min dollar) ödəməsini və komissiyalarının 17 faizlə məhdudlaşdırılmasını tələb edən qanun layihəsi təqdim edib. Təklif oktyabrda müzakirəyə çıxarılacaq.