Türkiyənin Mersin limanları Mersin-Adana-Osmaniye-Qaziantep Yüksək Sürətli Dəmir Yolu Layihəsi çərçivəsində həm Orta Dəhlizə, həm də İnkişaf Yoluna birləşdiriləcək, - Nəqliyyat və İnfrastruktur naziri Abdülkadir Uraloğlu bildirib.

Uraloğlu qeyd edib ki, layihə Mersin ilə Qaziantep arasındakı mövcud marşrutu 361 kilometrdən 312,5 kilometrə endirəcək.

“Layihə Qazianteptən Ovaköy istiqamətində planlaşdırılan yüksək sürətli dəmir yolu xətti vasitəsilə İnkişaf Yoluna, Aksaray-Ulukışla-Yenice Yüksək Sürətli Dəmir Yolu Layihəsi ilə isə Orta Dəhlizə inteqrasiya olunacaq,” - deyə nazir bildirib.

Uraloğlu əlavə edib ki, Mersin ilə Adana arasındakı mövcud dəmir yolu infrastrukturu yüksək sürətli qatar standartlarına uyğun təkmilləşdiriləcək. Həm sərnişin, həm də yük daşımaları üçün əlverişli, elektrikləşdirilmiş və siqnallı yeni xəttlər tamamlanacaq.

Mersin-Qaziantep marşrutunun yüksək standartlarda yenidən qurulduğunu və sərnişin qatlarının saatda 200 kilometrə qədər sürətlə hərəkətinə imkan yaradılacağını vurğulayıb.

“Saatda 200 kilometr dizayn sürəti ilə bu marşrut üzrə ildə təxminən 3,1 milyon sərnişin və 37,1 milyon ton yük daşınması nəzərdə tutulur,” - nazir deyib.

Uraloğlu əlavə edib ki, layihə Aralıq dənizindən Orta Dəhlizə fasiləsiz əlaqə yaradacaq və Türkiyənin qlobal logistika mövqeyini möhkəmləndirəcək.

Həmçinin, layihənin Suriya və İraq kimi qonşu ölkələrlə ticarəti əhəmiyyətli dərəcədə artıracağı və Türkiyəyə beynəlxalq təchizat zəncirlərində strateji üstünlük təmin edəcəyi gözlənilir.