Haitidə paytaxt Port-o-Prens yaxınlığındakı Kenskof şəhərində quldurların həyata keçirdiyi hücumda ən azı 47 nəfər öldürülüb, 50-dən çox adam girov götürülüb, 22 nəfər isə yaralanıb.

BMT Baş katibi Antonio Guterriş avqustun 23-ü axşamı baş vermiş hadisəni qınayıb. Bu hücum ölkədə son illərin ən böyük kütləvi girov götürmə əməliyyatlarından biridir.

Guterriş bildirib ki, insident Haitidə təhlükəsizlik vəziyyətinin nə qədər kritik olduğunu göstərir. O, quldurlarla mübarizəni gücləndirmək üçün yerli və beynəlxalq səylərin artırılmasının vacib olduğunu vurğulayıb.

Kenskof meri Jan Massilon hücum zamanı quldurların evləri yandıraraq xaos yaratdığını və sakinlərin qətlə yetirildiyini deyib. O əlavə edib ki, quldurlar bir kilsə və ictimai səhiyyə mütəxəssisi Jan Vilyam Papenin evini hədəfə alıblar.

Massilon hücumu ABŞ hökuməti ötən il “xarici terror təşkilatı” kimi tanıdığı Viv Ansanm qrupunun üzvlərinə bağlayıb.

BMT-nin Haitidəki inteqrasiya olunmuş ofisi ölənlərin sayının dəyişə biləcəyini bildirib.

Haiti hökuməti hadisəni “dəhşətli hücum” adlandıraraq təhlükəsizliyi gücləndirəcəyini və güc tətbiq edəcəyini vəd edib. Yerli sakinlər isə polis rəisinin istefasını tələb edir. Onlar bildirirlər ki, polis əməkdaşları qətliamın baş verdiyi yerə yaxın polis məntəqəsindən müdafiə təmin etməyib.

Kenskof sakini Mark Pol 42 yaşında olub. O, qardaşı, qayınanası, qayınatası və iki əmiuşağının quldurlar tərəfindən qaçırıldığını bildirib. 16 yaşlı qızının tutulub, zorlandıqdan sonra qaçaraq ailəsi ilə yenidən birləşdiyini qeyd edib.

Mark Pol müxbirlərə qaçarkən cəsədlərin üzərindən keçmək məcburiyyətində qaldığını deyib.

Başqa sakin Koriolan Kendi qohumunun qanlı dəsmal içində küçədə uzanan cəsədinin yanında dayanaraq hökuməti ittiham edib.

Baş nazirin ofisi Kenskofda tədbirin görüləcəyini açıqlayıb və “Kenskof tərk edilməyəcək” mesajını yayıb.

Sosial şəbəkələrdə yayılan videoda quldur lideri Haitinin milli polis rəisi Vladimir Paraisonu hədələyib. O bildirib ki, girovların zərər görməsi halında onları öldürəcək.

Quldur özünü İzo 2 kimi təqdim edib. Bu addan ölkənin ən güclü quldur liderlərindən olan İzo və ya Conson Andre nəzərdə tutulur.

Kenskof strateji mövqedə yerləşir və keçən ildən bəri onlarla quldur hücumuna məruz qalıb. Bu hücumlar minlərlə sakini evlərini tərk etməyə məcbur edib.

Geniş koalisiya altında fəaliyyət göstərən güclü quldurlar illərdir Port-o-Prensdə və ətraf bölgələrdə nüfuzlarını möhkəmləndirirlər. Ölkəyə göndərilən beynəlxalq dəstək polis qüvvələrinin zəifliyini aradan qaldıra bilməyib.