Fransa telekommunikasiya şirkətlərinə sosial media məhdudiyyətlərinə hazır olmağı tapşırıb

Mediaya görə, Fransa telekommunikasiya şirkətlərindən bu həftə sonu keçiriləcək etirazlarda potensial zorakılıq baş verərsə, sosial media platformalarına girişin dayandırılmasına hazır olmağı istəyib.

Fransanın onlayn nəşri Blast yazıb ki, Baş Nazir Sebastyen Lekornu şənbə günü keçiriləcək Sarı Jiletlər etirazından əvvəl Orange, SFR, Free və Bouygues Telecom şirkətlərinin nümayəndələrinə məktub göndərib.

Məktubda etirazlar zamanı zorakılıq baş verərsə, TikTok, Instagram, Snapchat və X daxil olmaqla sosial media platformalarına müvəqqəti girişin bloklanmasına hazır olmağı tapşırıb.

Lekornunun kabinet üzvləri və şirkətlərin hüquq direktorları da həftə sonu keçiriləcək etirazlar ərəfəsində onlayn görüş keçiriblər.

İclasın protokoluna görə, hökumət sosial media platformalarına giriş məhdudiyyətlərinin yalnız mobil telefonlar və müəyyən ərazilərlə məhdudlaşdırılmasını istəyib.

Şirkətlər hökumətin istəyinə şübhə ilə yanaşıb və bu tədbirləri qısa zamanda həyata keçirmək imkanlarının olmadığını deyib.

Hökumət Blast-ın xəbərinə hələ cavab verməyib.

2024-cü ildə Fransa hökuməti Yeni Kaledoniyada etirazlar zamanı TikToka girişin qarşısını alıb. 2025-ci ildə isə Fransa Dövlət Şurası bu qərarı ləğv edib.

Sarı Jiletlər hərəkatı şənbə günü yaşama xərclərinin artmasına etiraz etmək üçün küçələrə qayıdıb. Etirazlarda təxminən 1.000 nəfər həbs olunub.