Finlandiya Ukraynada sığınacaqların tikintisinə əlavə maliyyə vəsaiti ayırır

Finlandiya və Ukrayna Ukraynada sığınacaqların tikintisi üçün əlavə maliyyələşdirmə təmin edilməsi barədə razılaşma imzalayıb.

Bu barədə Ukrayna prezidenti Vladimir Zelenski Finlandiya baş naziri Petteri Orpo ilə keçirdiyi mətbuat konfransında bildirib.

"Sığınacaq koalisiyası" proqramı çərçivəsində bəzi obyektlər demək olar ki, tamamlanmaq üzrədir, digərləri isə tikinti prosesindədir. Prezidentin sözlərinə görə, daha çox mobil sığınacaqların təmin edilməsinə diqqət yönəldilir.

Zelenski deyib: "Finlandiya Sığınacaq koalisiyasının lideridir və bizim Ukraynada sığınacaqların tikintisini əlavə maliyyələşdirmə ilə təmin etmək üçün bu Koalisiyanın çərçivəsində əməkdaşlığa dair razılaşmamız var. Tikinti ölkənin müxtəlif bölgələrində başlayıb – müxtəlif layihələr var. Onların bəziləri yaxın zamanda tamamlanacaq, bəziləri isə daha mürəkkəbdir – məsələn, xəstəxanalarda sığınacaqlar – və hələ tikilir".

Zelenski və Orpo həmçinin razılaşıblar ki, Finlandiya Sığınacaq koalisiyasına daxil olan digər 16 üzv ölkələrlə beynəlxalq görüş təşkil etməyə çalışacaq.

Ukrayna prezidenti bildirib: "Bizə əlavə maliyyələşdirmə təmin etmək üçün görüşlər və formatlar lazımdır. Avropada Finlandiyanın sığınacaqların tikintisi üzrə ən böyük təcrübəsi və ən yüksək keyfiyyəti var".

Qeyd edək ki, 22 oktyabr görüşündə Finlandiya baş naziri Petteri Orpo Ukraynaya əlavə olaraq 5 milyon avro həcmində enerji dəstəyi göstərəcəyini açıqlayıb.

Eyni zamanda Orpo bildirib ki, ölkəsi Ukraynaya rusiyalıların hücumları nəticəsində yaranan itkiləri kompensasiya etmək üçün 10 lokomotiv verəcək.