ABŞ Dövlət Departamenti Fransadakı ABŞ vətəndaşlarını etirazlar barədə xəbərdar edib

ABŞ vətəndaşlarına Fransada olarkən kütləvi etirazların yenidən başlaması səbəbindən ehtiyatlı olmaları tövsiyə olunur.

Bu barədə ABŞ Dövlət Departamentinin Konsulluq məsələləri bürosunun açıqlamasında bildirilib.

Fransadakı gərgin vəziyyəti nəzərə alaraq, amerikalılara nümayişlərdən və qarışıqlıqların olduğu yerlərdən uzaq durmaları tövsiyə edilir. Xüsusilə oktyabrın 25-də Fransanın Sen-Deni şəhərində keçiriləcək Milli Futbol Liqasının oyununu izləyəcək şəxslərə.

"Çoxlu insanın toplandığı və ya polisin güclü olduğu yerlərdən uzaq durun. Oktyabrın 24-də şənbə günü bir çox qrup etiraz planları təqdim edib. Oktyabrın 25-də Sen-Denidə keçiriləcək NFL oyununa görə Parisdə olan amerikalılar da diqqətli olmalı və ətrafdakı vəziyyəti yaxından izləməlidir," – deyə bildirilib.

Dövlət Departamenti nümayiş yollarının əvvəlcədən razılaşdırıldığını, amma son anda dəyişikliklərin ola biləcəyini və etirazların planlaşdırılmamış marşrutlarda da keçirilə biləcəyini xəbərdar edib.

Qeyd edək ki, Fransada oktyabrın 24-nə ikinci böyük kütləvi etirazlar gözlənilir. Fransa Büş-dyu-Ron departamentinin valisi onun paytaxtı Marseldə və ətraf bölgələrdə bütün nümayişlərin qadağan edildiyini açıqlayıb. Eyni zamanda Marseldə ictimai nəqliyyatın fəaliyyəti gün ərzində dayandırılacaq.

Fransa prezidenti Emmanuel Makron oktyabrın 24-də yalnız peşəkar ittifaqların tələbi ilə təşkil olunan və "ticarət obyektləri və ictimai binaların qorunmasını təmin edən" marşrutlarla əlaqədar aksiya və tədbirlərin keçirilməsinə icazə veriləcəyini bildirib.