Qlobal enerji böhranı davam etdiyindən aparıcı Avropa investisiya fondları və institusional investorlar daşınmaz əmlak strategiyalarında enerji performansını önə çəkirlər. Milliyet qəzetinin yazdığına görə, ətraf mühitə zərərli, enerji effektivliyi aşağı və davamlılıq meyarlarına cavab verməyən binalar artıq risk kimi qiymətləndirilir.

Türkiyədə də oxşar dəyişikliyin olacağı gözlənilir. Aşağıkarbonlu binalar yaxın zamanlarda daha qiymətli və üstün tutulan obyektlərə çevriləcək.

2027-ci il yanvarın 1-dən etibarən 10 min kvadrat metrdən böyük yeni binalar Enerji Performans Sertifikatı və Bina Həyat Dövrü Qiymətləndirmə Sertifikatı almalıdır. Aşağıkarbonlu Bina Sertifikatı isə aşağı istixana qazı emissiyası olan binalara veriləcək. Bu sertifikatların ticarət mərkəzləri, otellər, xəstəxanalar və məktəb layihələrində investisiya qərarlarında vacib yeri olacaq.

Altensis idarəetmə tərəfdaşı Emre İlitalı bildirib ki, enerji effektivliyi artıq sadəcə ekoloji seçim deyil, həm də iqtisadi və geosiyasi təhlükəsizlik məsələsinə çevrilib. “Yaşıl bina olmaq artıq prestij deyil, yaşıl olmamaq ciddi riskdir,” deyə o vurğulayıb.

İlitalı əlavə edib ki, enerji səmərəsiz binalar xüsusən enerji xərclərinin dəyişkən olduğu mühitdə sürətlə dəyər itirir. “Hazırda Avropada bir çox investisiya fondları və institusional investorlar aşağı performanslı binaları risk amili kimi qiymətləndirir. Oxşar dəyişiklik Türkiyədə də baş verəcək,” deyə o bildirib.