ABŞ Qida və Dərman İdarəsi (FDA) pankreas xərçəngi müalicəsini təsdiqləyib. Klinik sınaqlarda dərman xəstələrin ümumi sağ qalma müddətini demək olar ki, iki dəfə uzadıb.

Daraksonrasib adlı dərman "Rasonk" brendi altında "Revolution Medicines" şirkəti tərəfindən istehsal olunur və dünyada ən ölümcül xərçəng növlərindən biri olan pankreas xərçənginə qarşı əhəmiyyətli addım sayılır.

500 xəstə üzərində aparılan gec mərhələ klinik sınaqda dərmanı gündəlik qəbul edənlərin sağ qalma müddəti 13,2 ay olub. Müqayisədə kimyaterapiya alanlarda bu müddət 6,6 ay təşkil edib.

FDA dərmanı pankreas xərçəngindən əziyyət çəkən və ənənəvi olaraq müalicəsi çətin olan xəstələr üçün kritik yeni seçim kimi dəyərləndirib.

Daraksonrasib mutasiyalaşmış KRAS genini bağlayaraq onun fəaliyyətini dayandırır. Bu gen pankreas şişlərinin 90 faizindən çoxunda mövcuddur və xərçəngin sürətli böyüməsinə səbəb olur.

Amerika Xərçəng Cəmiyyəti bildirir ki, ABŞ-da hər il təxminən 67 min nəfərə pankreas xərçəngi diaqnozu qoyulur və bu xəstəlik ən yüksək ölüm nisbətinə malik xərçənglərdən biridir.

Pankreas xərçəngi çox vaxt gec mərhələdə aşkar olunur və müalicəsi çətinləşir. Xəstələrin yarıdan çoxu diaqnozdan sonra üç ay ərzində həyatını itirir.

2025-ci ildə FDA daraksonrasibə "İnqilabi Müalicə" statusu verib. Bu, ağır xəstəliklərdə tezləşdirilmiş qiymətləndirmə deməkdir.

Agentlik dərmanı qeydiyyat üçün nəzərdə tutulmuş vaxtdan altı ay əvvəl təsdiqləyib. FDA-nın Onkologiya Mərkəzinin direktoru Angelo de Klaro deyib ki, dərman "yüksək ehtiyac olan sahədə misilsiz nəticələr göstərib".

Müalicənin ən çox rast gəlinən yan təsirləri qaşınma, ishal, ürəkbulanma, yorğunluq və qusmadır. FDA bildirir ki, daraksonrasib qəbul edənlərin 44 faizi ağır yan təsirlərlə üzləşib. Kimyaterapiya alanlarda isə bu göstərici 57,5 faiz olub.

ABŞ-ın keçmiş senatoru Ben Sasse ötən il dekabrda dördüncü mərhələ pankreas xərçəngi diaqnozu aldığını açıqlayıb. O, dərmanla klinik sınaqlarda iştirak edir və şişlərinin kiçildiyini deyib.