Qvineya qiymətli metalın yerli emalını təşviq etmək məqsədilə xam qızılın ixracını qadağan edib.

Bu dərhal qüvvəyə minən siyasət Prezident Mamadi Doumbouyanın sənaye və sənətkarlıq qızıl istehsalçıları və alıcıları ilə görüşündən sonra qəbul olunub və iqtisadiyyatın inkişafı ilə daha çox iş yerlərinin yaradılmasını nəzərdə tutur.

"Qvineyada istehsal olunan qızıl bundan sonra ölkə daxilində emal olunmalıdır. Xam qızıl Qvineyadan çıxmayacaq," - o bildirib və əlavə edib ki, digər ölkələr öz xam materiallarının emalı və ticarətindən iqtisadi fayda götürürlər.

Beynəlxalq Qızıl Şurasının məlumatına görə, Qvineya Afrika qitəsinin altıncı ən böyük qızıl istehsalçısıdır.

Digər Afrika ölkələri son illərdə mədən sektorunda yerli emalın və əlavə dəyərin artırılması ilə bağlı oxşar addımlar atıblar.

Tanzaniya və Uqandada qızıl və mis kimi emal olunmamış mineral və metalların ixracı artıq qadağan edilib, Qana isə 2030-cu ilə qədər xam qızıl ixracını dayandırmağı planlaşdırır.

Afikanın aparıcı litium istehsalçısı Zimbabve bu metalın konsentratının, batareyaların istehsalında istifadə olunan litiumun, 2027-ci ildən ixracını qadağan edib.

Qızıl Qvineyanın əsas ixrac məhsullarından biridir; hakimiyyət orqanlarının məlumatına görə, bu ilin birinci rübündə ölkə 22 tondan çox qızıl göndərib.

Paytaxt Konakridə yeni bir emal zavodu tezliklə fəaliyyətə başlayacaq, qızıl əvvəlcə bu mərkəzə göndəriləcək, orada emal olunaraq sonra ixrac ediləcək. Zavodun illik emal gücü 250 ton təşkil edir və ölkənin cari istehsalını qarşılamağa imkan verir.

Ölkədə fəaliyyət göstərən xarici şirkətlərə xəbərdarlıq edilib ki, bu qaydanı pozanlar lisenziyalarını itirə və mədən müqavilələri ləğv edilə bilər.

Qvineya həmçinin dünya üzrə ən böyük boksit istehsalçısıdır, bu metal alüminium istehsalında istifadə olunur.