Polşa və Rumıniya Ukrayna taxılı üçün tranziti artırmaqdan imtina edib

Ukrainskaya Pravda yazır ki, Polşa və Rumıniya Ukraynanın taxıl ixracında tıxanmanı aradan qaldırmaq üçün tranzit imkanlarını genişləndirməkdən imtina edib. Bu, Qara dəniz blokadası ilə əlaqədar yaranan ixrac böhranının fonunda baş verir.

Rumıniyada bildirilir ki, ölkədə taxılın çoxluğu və Dunay çayında suyun aşağı səviyyəsi limanlarda yükləməni çətinləşdirib. Bu, rumın fermerlərinin məhsullarını satmaq imkanını məhdudlaşdırır. Rumıniya Kənd Təsərrüfatı naziri Barna Tançoş açıqlayıb ki, "öz fermerlərimizin maraqları üstünlükdədir".

Ukrayna Kənd Təsərrüfatı naziri Taras Vısotski bu həftə Brüsseldə Avropa İttifaqının həmkarlarına müraciət edib. Onun sözlərinə görə, indi Ukrayna ixracının yarıdan az hissəsi Avropa üzərindən — dəmiryolu, avtomobil və su yollarıyla daşınır. Blokada davam edərsə, bu il ölkədə 35 milyon ton taxıl qalması mümkündür.

Rumıniya logistikanı təkmilləşdirməyə çalışır. Keçən ay Buxarest Kiyev ilə sərhəd keçidini asanlaşdırmaq və dəmiryolu əlaqələrini gücləndirmək üçün anlaşma memorandumu imzalayıb. Lakin Tançoş qeyd edib ki, yolların, dəmiryolunun və limanların keçid qabiliyyətini ikiqat artırmaq mümkün deyil.

Polşada isə İnfrastruktur Nazirliyinin sözçüsü Anna Şumanskaya bildirib ki, hökumət Ukrayna kənd təsərrüfatı məhsullarının tranzitini artırmaq üçün heç bir dəyişiklik planlaşdırmır.

Xatırladaq ki, ötən ay Estoniya Rusiya və Belarusa məxsus taxılın tranzitinə qadağa tətbiq edib. Latviyada isə Ukraynadan oğurlanmış məhsulun tranzitinin qarşısını almaq üçün sərhəd nəzarəti gücləndirilir.