İsrail heyəti Flydubai təyyarəsi ilə bağlı BƏƏ-yə göndərilib

Anadolu Ajansı yazır ki, İsrailin araşdırma heyəti axşam saatlarında Birləşmiş Ərəb Əmirliklərinə (BƏƏ) çatıb. Heyət Flydubai təyyarəsi ilə bağlı aparılan araşdırmaya dəstək məqsədilə göndərilib.

İsrail dövlət televiziyası KAN xəbər verib ki, Suudi Ərəbistan və BƏƏ İsrailin Flydubai təyyarəsi ilə bağlı rəsmi araşdırmaya qoşulmaq istəyini qəbul etməyib. Suudi Ərəbistan təyyarənin öz ərazisində fövqəladə eniş etməsinə görə, BƏƏ isə təyyarənin Flydubai şirkətinə aid olması səbəbindən araşdırmanı idarə edir.

İsrail mətbuatı xəbər yayıb ki, Dubaydan Televizə yönələn təyyarə İordaniya hava məkanında “7700” ümumi fövqəladə kodu, sonradan isə təyyarənin qaçırılması mənasına gələn “7500” kodunu göndərib.

Kanal 12 isə təyyarədə pilotların münaqişəsi səbəbindən hadisənin baş verdiyini bildirib. Yardımçı pilotun Oman vətəndaşı olduğu, kapitan pilotu bıçaqlayaraq təyyarəni düşürməyə cəhd etdiyi iddia olunub. Kabin heyəti və bəzi sərnişinlərin isə köməkçi pilotu dayandırmağa çalışdığı qeyd edilir.

İsrail Baş naziri Binyamin Netanyahu olayda bir pilotun təyyarəni endirməyə çalışması barədə işarələr olduğunu deyib. Flydubai isə təyyarənin kokpitində yaranan münaqişənin səbəbinin bəlli olmadığını açıqlayıb.

Suudi Ərəbistan Daxili İşlər Nazirliyi isə ilkin araşdırmalar zamanı yardımçı pilotun kapitan pilota hücum etdiyini və hər iki pilotun yaralandığını təsdiqləyib. Onların müalicələri başa çatandan sonra BƏƏ təhlükəsizlik heyəti müşayiəti ilə Abu Dabiyə yollandıqları bildirilib.