İspaniyada sel nəticəsində 102 yaşlı qadın vəfat edib

Ukrainskaya Pravda yazır ki, İspaniyanın Albasete əyalətində yerləşən Madrigeres şəhərində 102 yaşlı qadın sel nəticəsində həlak olub.

Şəhərdə kvadrat metrə 142 litr yağıntı düşdüyü üçün su sürətlə ərazini basıb. Yerli hakimiyyət orqanları əlverişsiz hava şəraitinə qarşı tədbirlər planını işə salıblar.

Qadının evi suyun səviyyəsinin bir metrə çatdığı ərazidə tapılıb. Cümə günü gecə yarısına qədər xilasetmə xidmətləri əsasən su basmış evlərdən təxminən 90 nəfəri təxliyə ediblər.

Region hakimiyyətləri bildiriblər ki, sakinlərdən çoxsaylı zənglər daxil olub, insanlar qorxub və necə davranacaqlarını bilməyiblər.

İspaniya baş naziri Pedro Sançes həlak olan qadının ailəsinə başsağlığı verib və zərər çəkənlərə dəstək göstərib.

Madrigeresə Kastiliya-La-Mança muxtar regionunun prezidenti Emiliano Qarsiya-Pahe gəlib. Milli Qvardiya selin nəticələrinin aradan qaldırılması üzrə iş aparır.

Cümə axşamı və gecə güclü yağışlar Tarragona, Kastelyon və digər əyalətlərdə də olub. Ölkənin digər bölgələrində havanın pis keçəcəyi və həftəsonları davam edəcəyi proqnozlaşdırılır.