G7 Ukraynaya Rusiyanın dondurulmuş aktivləri hesabına kömək göstərib

News.ru yazır ki, G7 ölkələri Ukraynaya Rusiyanın dondurulmuş aktivlərinin gəlirlərindən istifadə edərək təxminən 50 milyard dollar həcmində kredit verib. Bu məbləğə Ukrayna Maliyyə Nazirliyi və digər milli qurumların məlumatları əsasında nəzər salınıb.

2024-cü ildə G7 belə kredit ayırılmasını təsdiqləyib. Sentyabrın sonuna kimi Ukrayna 49,4 milyard dollar (3,85 trilyon rubl) məbləğində vəsait alıb. İlk bir milyard dollarlıq ödənişi ABŞ ötən il gerçəkləndirib, lakin daha sonra Vaşinqton Rusiya aktivlərinin gəlirlərindən əldə edilən vəsaiti göndərməyib.

Digər G7 üzvləri ötən il Ukraynaya 37,9 milyard dollar (2,96 trilyon rubl) ötürüb, bu il isə əlavə 10,5 milyard dollar (819 milyard rubl) göndərilib. Beləliklə, əsas maliyyə yardımı Ukraynanın Avropa tərəfdaşlarından gəlib.

Rusiya Mərkəzi Bankına məxsus aktivlər 2022-ci ildə Ukraynadakı müharibənin başlanmasından sonra dondurulub. Mərkəzi Bankın qiymətləndirməsinə görə, bu aktivlərin ümumi dəyəri 210 milyard avrodan (19,2 trilyon rubl) çoxdur və əsas hissəsi Avropanın aparıcı depozitarı olan Euroclear-də saxlanır.

Rusiya bu addıma qarşılıq olaraq qeyri-dost dövlətlərin investorlarının aktivlərini və onlardan gələn gəlirləri "С" tipli xüsusi hesablarda toplayır. Bu vəsait yalnız xüsusi hökumət komissiyasının qərarı ilə çıxarıla bilər.

Beynəlxalq "Valday" Klubunun eksperti, politoloq Andrey Kortunov hesab edir ki, Avropa İttifaqı Rusiya aktivlərini zəbt etmək qərarına gələ bilər. Onun fikrincə, bu addım Avropa maliyyə institutlarından digər dövlətlərin kapitalının çıxmasına səbəb olacaq.