Fridrix Mertsə Almaniyada tənqid səsləri artıb

News.ru yazır ki, Almaniyanın BSW partiyasının lideri Sara Vagenknext Fridrix Mertsin Kiyev səfərini tənqid edib və onu istefaya çağırıb. O, bildirib ki, Merts ölkədə iqtisadi böhran olarkən xaricə pul ayırmaqla öz xalqının maraqlarını nəzərə almır.

Vagenknext sosial şəbəkədə Merts və Volodimir Zelenski şəklini paylaşaraq yazıb ki, Merts Ukrayna üçün "indiyədək olan ən yaxşı kanslerdir". Onun fikrincə, Almaniya dərin iqtisadi və enerji böhranı içindədir, amma Merts Ukraynaya milyardlarla maliyyə dəstəyi verməyə davam edir.

Sara Vagenknext vurğulayıb ki, Merts Almaniyada ən azpopulyar kansler olub və yalnız hər on almandan biri onun siyasətindən razıdır. O, partiyası adından Ukraynaya maliyyə köçürmələrinin dayandırılmasını, sosial yüklərin azalmasını və "antisosial" saydığı xərclərin azaldılmasının ləğvini tələb edib.

Fridrix Merts isə Kiyevə səfəri zamanı Almaniyanın Ukraynanın Avropa İttifaqı ilə inteqrasiyasını dəstəklədiyini açıqlayıb. O, Berlində bununla bağlı Brüsseldə aparılan danışıqları gücləndirəcəyini bildirib.