Flai AI proqramı ayda 50 min görüş təyin edir

TechCrunch yazır ki, Flai startapı bir il əvvəl avtomobil satıcıları üçün zəng, e-poçt və mesajları idarə edən proqramını təqdim etmişdi. Hazırda şirkət ABŞ-dakı ən yaxşı 50 diler qrupundan 10-dan çoxu ilə əməkdaşlıq edir və süni intellekt müştəri ilə əlaqə saxlayır, kampaniyalar idarə edir, görüşlər təyin edir.

Ayda 50 min görüşü avtomobil satış və servis xidmətləri üzrə təşkil edən proqram şirkətin gəlirlərini 20 dəfə artırıb. Flai CEO-su Ari Polakof bildirib ki, proqram həm müştəri zənglərinə cavab verir, həm də rəhbərliyə müştəri narazılıqları barədə məlumat verir.

Bu uğur Flai-yə yeni sərmayələr qazandırıb. Şirkət 27 milyon dollar məbləğində A seriyası investisiya cəlb edib. Sərmayə avtomatlaşdırma üzrə ixtisaslaşan Base10 Partners tərəfindən idarə olunub və Friedkin Group, Findlay Automotive, Toyota Ventures, Y Combinator və First Round Capital digər iştirakçılardır.

Flai müştərilərinə təkcə zəngləri cavablandırmaqla kifayətlənmir, həm də müştərilərlə əlaqələri izləyir və rəhbərlik üçün xəbərdarlıqlar göndərir. Proqram hər dilerə uyğunlaşaraq avtomobil satıcılarına xüsusi hazırlanıb. Bu da bazarda digər süni intellekt proqramlarından fərqlənməsinə səbəb olur.

Flai proqramı çoxdilli dəstək təklif edir. Məsələn, Puerto Rikodakı lüks dilerlə əməkdaşlıqda proqram söhbət zamanı ispanca və ingiliscə arasında keçid edə bilir. Şirkət bu dilerin bütün 8 mağazasında sistemdən istifadə edir.

Sürətli işə salınma və müştəri məmnuniyyəti Flai proqramının uğurunun əsas amillərindəndir. Proqram imzalanandan sonra 10 günə aktivləşir, və şirkət komandası müştəri sorğularına ən çox 20 dəqiqə ərzində cavab verir. Bu yanaşma istifadəçi etimadını artırır və yeni müştərilərin yarısı köhnə müştərilərin tövsiyəsi ilə cəlb olunur.