Cevdet Yılmaz birlik və ədalət çağırışı etdi

Anadolu Ajansı yazır ki, Cevdet Yılmaz 13-cü Ümumdünya Bediüzzaman Sempozyumunun açılış mərasimində çıxış edib. O, beynəlxalq miqyasda yaşanan çoxsaylı böhranlara qarşı Qurani-Kərim prinsipləri əsasında həll yolları axtarılmasının vacib olduğunu bildirib.

Yılmaz dünyanın müxtəlif bölgələrində müharibələr, zorunlu köçlər və sosial ədalətsizliklərin artdığını vurğulayıb. O, beynəlxalq hüquq və qurumların güc sahiblərinin maraqları qarşısında səmərəsiz qaldığını, bu vəziyyətin zərərini daha çox zəif və günahsız əhalinin çəkdiyini qeyd edib.

Prezident Administrasiyasının nümayəndəsi İsrailin Qəzzəyə qarşı sərt hücumlarını qətiyyətlə qınayıb, uşaqların öldürülməsi və mülki əhalinin zəruri ərzaqlardan məhrum edilməsi faktlarına diqqət çəkib. O, soyqırım və haqsızlıqlara qarşı beynəlxalq sistemdə səssiz qalmanın dərin böhranın göstəricisi olduğunu vurğulayıb.

Cevdet Yılmaz bütün zalımlara qarşı həmrəyliyin vacibliyini və Türkiyə ilə İslam dünyasının həm güclü, həm də haqqın tərəfində olmaları üçün birgə səylərini davam etdirmələrinin əhəmiyyətini bildirib.

O, İslam dünyasında müxtəlif etnoslar və məzhəblər arasındakı fərqliliklərin aradan qaldırılması və diqqətin birliyə yönəldilməsinin zəruriliyini qeyd edib. Yılmaz Prezident Rəcəb Tayyib Ərdoğanın “Dünya 5-dən böyükdür” çağırışından sitat gətirərək, daha ədalətli qlobal nizam üçün insanlıq ittifaqının yaradılmasının vacib olduğunu bildirib.